انہوں نے ذہنی پروگرامنگ اور مائنڈ سیٹ کی اہمیت پر زور دیتے ہوئے عقاب کی مثال دی۔ عقاب اپنے بچے کو اڑنا سکھانے کے لیے اسے آرام دہ گھونسلے سے باہر نکالتا ہے۔ جب بچہ فضا میں گرتا ہے تو اسے اپنے پروں کی طاقت کا احساس ہوتا ہے۔ اسی طرح بعض اوقات اساتذہ، والدین یا رہنما ہماری آسانیاں کم کرتے ہیں تاکہ ہم اپنی صلاحیتوں کو پہچان سکیں۔ اسی طرح زرافہ اپنے نومولود بچے کو پیدائش کے فوراً بعد کھڑا ہونے پر مجبور کرتا ہے، کیونکہ اگر وہ زمین پر پڑا رہے تو شکاری جانور اسے نقصان پہنچا سکتے ہیں۔ بظاہر سختی دراصل خیرخواہی اور حفاظت کی ایک شکل ہوتی ہے۔ انہوں نے راجر بینسٹر کی مثال دیتے ہوئے بتایا کہ 1954ء سے پہلے سائنس دان سمجھتے تھے کہ انسان چار منٹ سے کم وقت میں ایک میل نہیں دوڑ سکتا۔ راجر بینسٹر نے اس ناممکن سمجھے جانے والے ریکارڈ کو توڑ کر ثابت کیا کہ اصل رکاوٹ جسم سے زیادہ ذہن میں ہوتی ہے۔ حیرت انگیز طور پر اس کا ریکارڈ صرف چالیس دن قائم رہا، کیونکہ اب دوسرے لوگوں کو بھی یقین آ گیا تھا کہ یہ ممکن ہے۔ انہوں نے کہا کہ انسان کی کامیابی یا ناکامی کا بڑا حصہ اس کے مائنڈ سیٹ سے جڑا ہوتا ہے۔ جب سوچ بدلتی ہے تو امکانات بدل جاتے ہیں، اور جب ذہنی پروگرامنگ تبدیل ہو جائے تو ناممکن نظر آنے والے کام بھی ممکن ہو جاتے ہیں۔